“大闸蟹”的由来

  现代作家包笑天晚年写个《大闸蟹史考》，引用了苏州古籍收藏家吴讷士个说法：“凡捕蟹者，伊拉辣港湾间，必设一闸，以竹编成。夜来隔闸置一灯火，蟹见灯光爬上竹闸，即在闸上一一捕之，甚为便捷。此是闸蟹之名所由来了。”搿搭个“竹闸”，应该属于硬造个名称，伊实际就是“簖”。勿少人侪晓得，辣辣六朝时期，吴淞江下游个渔民发明了“沪”，搿种插辣河浜浅滩浪个竹栅栏，退潮个辰光可以拦牢鱼蟹；到了唐代，由于“沪渎”经常作为地名出现辣诗赋当中，渔民们为了避免概念混淆，根据“沪”个“断鱼蟹之退路”功能，拿伊改称“簖”，所以陆龟蒙个《渔具诗·序》明确讲“沪，吴人今谓之簖”。搿歇，“簖”仍旧是江南农村个传统渔具，《现代汉语词典》对伊迭能解释：“拦河插在水里竹个栅栏，用来阻挡鱼、虾、螃蟹，以便捕捉。”既然“簖”从来呒没叫过“闸”，“大闸蟹”是因为捕捉工具而得名个说法就立勿牢脚了。

  前两日，趁到上海郊区去参观蟹塘个机会，问过一位年长个蟹农：“老伯伯，侬晓得‘大闸蟹’个名称是哪能来个[口伐]？”埃个蟹农想了一歇，捞起一只螃蟹笑了讲：“记得伲阿奶讲过，雌蟹个半圆形脐盖像‘大闸门’，雄蟹个尖脐盖像‘小闸门’，伊拉身浪向侪有一扇‘闸门’，所以叫做‘闸蟹’或者‘大闸蟹’。镇文化中心搜集民间传说个辰光，我拿迭桩事体写下来了！”伊看见我有眼勿相信，就从屋里向拿出一本镇文化中心编个民间传说集。埃个蟹农讲个内容，辣辣前人笔记文献脱仔相关书籍当中侪寻勿着，完全属于一种民间传说。“大闸蟹”是因为长相而得名个说法虽然生动，但明显属于硬装榫头，实在经勿起推敲。

  其实，“大闸蟹”是从“大煠蟹”演变过来个。三国时期张揖个《广雅》（后来改名《博雅》）提到：“煠，瀹也；汤煠也。音闸。”清代嘉庆、道光年间个苏州文人顾禄，辣辣伊个《清嘉录》里向讲：“湖蟹乘潮上，簖渔者捕得之，担入城市，居人买以相馈贶，或宴客佐酒。有‘九雌十雄’之目，谓九月团脐佳，十月尖脐佳也。汤煠而食，故谓之‘煠蟹’。”埃个辰光，卖蟹人挑担进城沿街叫卖，勿断高喊“煠蟹唻大煠蟹”，成为秋天个一道风景。此地个“煠”是指煮，现在个《新华字典》仍旧拿“煠”列为“炸”个异体字，并解释成“拿食物放辣煮沸个油或水里弄熟”。螃蟹一般侪煠来吃，所以大家拿伊叫做“煠蟹”。老早黄浦江脱仔吴淞江出产个“清水蟹”，只头大、肉结实，拨上海人称为“大煠蟹”。大概是“煠”字比较生僻个缘故，日脚一长，谐音个“大闸蟹”就慢慢替代了“大煠蟹”，并且一直沿用到今朝。归根到底，“大闸蟹”是因为烹制方法而得名个。